E martë , 7 Korrik 2020

Haradinaj s’tërhiqet nga taksa pa njohjen e pavarësisë nga Serbia

Aleanca për Ardhmërinë e Kosovës ka shënuar sot 19-vjetorin e themelimit.

Me një ceremoni të mbajtur në Prishtinë, kryeministrit i Kosovës, i cili drejton AAK-në, ka mbledhur strukturat e partisë, anëtarët e bashkëpunëtorët për të shënuar këtë përvjetor. Aty Haradinaj i ka bërë thirrje Serbisë që ta njohë shtetësinë e Kosovës, meqë siç tha ai, në atë formë ata do ta çlirojnë edhe veten.

Kryeministri Haradinaj, i cili po vazhdon të mbajë qëndrimin e njëjtë për taksën 100 për qind ndaj produkteve serbe, ka thënë se me njohjen e Kosovës nga Serbia, këta të fundit do të kalonin më lehtë në zhvillim ekonomik dhe do të zhvillonin tregti të lirë pa pengesa. Por sipas Haradinajt, për këtë nuk ka vullnet politik nga ana e Serbisë.

“I bëj thirrje popullit serb, Serbisë, udhëheqjes, ta kuptojnë që duke e njohur pavarësinë e Kosovës, e lirojnë veten, ata shkojnë më shpejt drejt familjes së popujve të lirë të BE-së, edhe ata kalojnë më shpejt te një prosperitet i zhvillimit ekonomik, te një tregti e lirë, pa tarifa dhe pa pengesa të cilën edhe ne e presim. Por para se të na njohë, duhet të bëhemi gati me heq edhe pak, se po shihet që nuk ka vullnet politik në anën tjetër, ndërsa unë mendoj që në Prishtinë ka”, tha ai, raporton Ksp.

Kryeministri ka thënë se Kosova është e të gjithëve që jetojnë në të. Ai ka deklaruar se Kosova është edhe shtet i serbëve që jetojnë këtu, që siç tha ai, Serbinë e kanë shtëpi të dytë.

“Kosova si shtet i imi, është shtet edhe i serbëve të Kosovës, Serbinë e kanë familje të dytë, shtëpi të dytë, shtëpi të parë e kanë Kosovën, të gjitha komunitetet që jetojnë në Kosovë, shtëpia e parë e tyre është Kosova, si për mua ashtu edhe për të gjithë që jetojnë në Kosovë. Ky është shteti ynë”, tha Haradinaj.

Në 11 vjetorin e Aleancës për Ardhmërinë e Kosovës, kryetari i saj ka thënë se Kosova është Evropë dhe i takon botës të cilës i prinë Amerika.

“Jam Evropë, populli i Kosovës është Evropë, kështu na ka falë Zoti, jemi të gatshëm t’i takojmë familjes politike e ekonomike të Evropës, por edhe Evropa duhet të kuptojë që jemi Evropë. Ne jemi edhe botë, i takojmë edhe botës. Kush është bota jonë, a kemi botë ne? Ne jemi të botës që i prinë Amerika, nuk është marre me e thënë”, tha ai.

Check Also

Engel i thotë preshevarëve, kryetarin e keni shumë të mirë

Kongresmeni amerikan, Eliot Engel ka vizituar Luginën e Preshevës.> Pas takimit me kryetarin e komunës …